 |
საპროტესტო აქცია ისევ გრძელდება ზუგდიდში, „ერთიანი ნაციონალური მოძრაობის“ საარჩევნო შტაბთან. გარდაცვლილი დავით ცინდელიანის და პაატა ქარდავას ოჯახის წევრები ზუგდიდის გამგებლობის კანდიდატ, თენგიზ გუნავასთან შეხვედრას მოითხოვენ. პარტიის ოფისთან მობილიზებულია პოლიცია, რომელმაც აქციის მონაწილეებს შტაბში ძალის გამოყენებით შეღწევის საშუალება არ მისცა.
დავით ცინდელიანის დედამ, თამარ არღვლიანმა ჟურნალისტებს უთხრა, რომ მისი შვილის გაუჩინარების და მკვლელობის საქმის მონაწილე კონსტიტუციური უსაფრთხოების დეპარტამენტის ყოფილ უფროს, დათა ახალაიასთან ერთად აფხაზეთის სამმართველოს ყოფილი უფროსი რომან შამათავა და იმ დროს სამხარეო პოლიციის მთავარი სამმართველოს ყოფილი უფროსი თენგიზ გუნვაა. „ჩემი შვილის თავის ქალა მაინც მინდა, გულში რომ ჩავიხუტო. დაისაჯოს ყველა ვინც მონაწილეობდა ამ საქმეში, ახალაია, გუნავა და შამათავა“, - განაცხადა თამარ არღვლიანმა.
გარდაცვლილი თავდაცვის ოფიცრის პაატა ქარდავას შვილი, ქრისტინე ქარდავა ამბობს, რომ ტელევიზიით გამოსვლისას ნაციონალური მოძღაობის წარმომადგენლები დასცინიან მათ ოჯახს, როდესაც ამბობენ, რომ თითქოს მამის გვამი ნაპოვნი არ არის და საქმის გახსნა არჩევნებს უკავშირდება.
შინაგან საქმეთა სამინისტრომ დავით ცინდელიანის გაუჩინარების საქმე გახსნილად 10 ივნისს გამოაცხადა.
„რომან შამათავამ და მისმა რამდენიმე თანამშრომელმა დათო ცინდელიანი მიიყვანეს ქალაქ ბათუმში, შავი ზღვის ნავმისადგომთან, სადაც რომან შამათავა დათო ცინდელიანს აფხაზ სეპარატისტებთან თანამშრომლობაში ადანაშაულებდა, რასაც იგი უარყოფდა. ცოტახანში ისინი შევიდნენ შავი ზღვის სიღრმეში, დაახლოებით 4 კილომეტრის მანძილზე. რომან შამათავამ ცეცხლსასროლი იარაღიდან თავის არეში ერთი გასროლით მოკლა დათო ცინდელიანი. შემდეგ დათო ცინდელიანის გვამს სხეულზე თოკით შეაბა ნავზე არსებული ბეტონნარევი რკინის ღუზა და ცხედარი შავ ზღვაში გადააგდო.
რომან შამათავა მიცემულია სისხლის სამართლის პასუხისგებაში თავისუფლების უკანონო აღკვეთისა და დამამძიმებელ გარემოებებში განზრახ მკვლელობის ბრალდებით, საქართველოს სსკ-ის 143-ე მუხლის მეორე ნაწილის „გ" ქვეპუნქტით და სსკ-ის 109-ე მუხლის მეორე ნაწილის „ბ" ქვეპუნქტით. საქმეზე გამოძიებას აწარმოებს სახელმწიფო უსაფრთხოების სააგენტოს საგამოძიებო მთავარი სამმართველო", - ნათქვამია სამინისტროს განცხადებაში.
რაც შეეხება თავდაცვის ოფიცრის პაატა ქარდავას გაუჩინარების და მკვლელობის საქმეს შინაგან საქმეთა სამინისტრომ, საქმე გახსნილად 5 ივნისს გამოაცხადა. სამინისტროს ინფორმაციით, პაატა ქარდავას საქმე უკავშირდება საქართველოს შინაგან საქმეთა სამინისტროს კონსტიტუციური უსაფრთხოების დეპარტამენტის აფხაზეთის მთავარი სამმართველოს მაშინდელ უფროს რომან შამათავას, რომელიც ე.წ. ხურჩის ტერაქტის საქმეზე უკვე დაკავებულია.
შინაგან საქმეთა სამინისტროს განცხადებაში ნათქვამია, რომ - „რომან შამათავამ და მისმა თანამზრახველებმა პაატა ქარდავა გადაიყვანეს ბათუმში და მიიყვანეს შავი ზღვის ნავმისადგომთან, სადაც რომან შამათავა პაატა ქარდავას აფხაზ სეპარატისტებთან თანამშრომლობაში ადანაშაულებდა, რის შემდეგაც მან ფიზიკური შეურაცხყოფა მიაყენა პაატა ქარდავას, რომელიც თავის მხრივ კატეგორიულად უარყოფდა აღნიშნულს. რომან შამათავას დავალებით, მას და მისი ჯგუფის წევრებს ნავმისადგომთან ელოდებოდა აჭარის ავტონომიური რესპუბლიკის კუდ-ის მთავარი სამმართველოს მოტორიანი ნავი, რომელსაც მართავდა ამავე დანაყოფის თანამშრომელი.
ბორკილდადებული და თვალებახვეული პაატა ქარდავა ჩასვეს აღნიშნულ ნავში, რომან შამათავამ მას ფეხზე მოაბა ბეტონის ნატეხი და შევიდნენ შავი ზღვის სიღრმეში, დაახლოებით 10 კილომეტრის მანძილზე, რა დროსაც რომან შამათავამ ცეცხლსასროლი იარაღიდან თავის არეში ერთი გასროლით მოკლა პაატა ქარდავა და ცხედარი ზღვაში გადააგდო. ჩადენილი დანაშაულისთვის რომან შამათავა მიცემულია სისხლის სამართლის პასუხისგებაში თავისუფლების უკანონოდ აღკვეთისა და განზრახ მკვლელობის ბრალდებით. საქმეზე გამოძიებას აწარმოებს სახელმწიფო უსაფრთხოების სააგენტოს საგამოძიებო მთავარი სამმართველო“.
პაატა ქარდავას ოჯახი კონსტიტუციური უსაფრთხოების დეპარტამენტის აფხაზეთის სამმართველოს ყოფილ უფროს, რომან შამათავასთან ერთად იმ პირების დასჯასაც ითხოვს, ვინც საქმეში მონაწილეობდა. ერთ-ერთ ასეთად კი ოჯახი სამეგრელო-ზემო სვანეთის სამხარეო მთავარი სამმართველოს ყოფილ უფროსს, თენგიზ გუნავას ასახელებს, თუმცა იგი ბრალდებას „საარჩევნოდ შეთითხნილს“ უწოდებს ხელისუფლების მიერ.
_5769.jpg)
