შვედეთის საგარეო საქმეთა მინისტრის, კარლ ბილდტის განცხადებით, "მიხეილ სააკაშვილი არათუ "ახალი ტიმოშენკო", არამედ შესაძლოა, "უარესიც" გახდეს".
ბილდტმა აღნიშნული ბრიუსელში, რადიო თავისუფლებისთვის მიცემულ ინტერვიუში განაცხადა.
შეკითხვაზე, რომელიც საქართველოში პოლიტიკურად მოტივირებული სამართლებრივი დევნის ალბათობას ეხებოდა, ბილდტმა უპასუხა, რომ მართლაც ხედავს შურისძიების პოლიტიკის ტენდენციებს.
მისივე თქმით, ათიოდე დღის წინ, საქართველოში ვიზიტისას, მან და პოლონეთის საგარეო საქმეთა მინისტრმა რადოსლავ შიკორსკიმ პირდაპირ უთხრეს საქართველოს პრემიერ-მინისტრს, რომ ეს არ არის წინსვლის მომტანი გზა.
"თუ არის საქმეები, რომლებიც სასამართლოში განიხილება - წესიერ სასამართლოში - ეს ერთია! მაგრამ როცა გვაქვს პოლიტიკური ასპექტები - ხალხი დაკავებული გყავს საკმაოდ დიდი ხნით, სასამართლოში საქმის განუხილველად, ამას შურისძიების პოლიტიკის სუნი უდის და ეს არ არის გამართლებული გზა", განაცხადა ბილდტმა.
შვედეთის საგარეო უწყების ხელმძღვანელს რადიო თავისუფლების კორესპონდენტმა ჰკითხა, აგრეთვე, შესაძლებელია თუ არა, რომ საქართველოს პრეზიდენტი მიხეილ სააკაშვილი, მის წინააღმდეგ გამოძიების დაწყების შემთხვევაში, ახალი ტიმოშენკო გახდეს (უკრაინის ყოფილი პრემიერ-მინისტრი იულია ტიმოშენკო, როგორც ცნობილია, პატიმრობაში იმყოფება). პასუხად ბილდტმა გამოთქვა მოსაზრება, რომ "ამ კონკრეტულ შემთხვევაში, შესაძლოა, უარესიც" მოხდეს.
"ჩვენ ძალიან მკაფიოდ ვუთხარით ბატონ ივანიშვილს, რომ თუ ამ საქმეს წამოიწყებს, საქართველოს საგარეო პოლიტიკა, შეიძლება ითქვას, ამ ერთი საკითხით შემოიფარგლება მომდევნო რამდენიმე წელი, რაც ზიანს მიაყენებს ქვეყნის განვითარებას", განაცხადა ბილდტმა.
შვედი მინისტრის თქმით, საქართველოში დემოკრატიული გარდაქმნის პროცესი მთლიანობაში დადებითად მიმდინარეობს.
წყარო http://accent.com.ge/
_5769.jpg)
