ბოლო დროს სექსუალური უმცირესობების უფლებების დაცვის თემა საკმაოდ მწვავედ განიხილება. ამ განხილვის ფონზე კი რამდენიმე დღის წინ ცირკის მიმდებარედ ტრანსგენდერი მამაკაცი ძალადობის მსხვერპლი გახდა, თუმცა არის ეჭვი, რომ დაჩაგრული უმცირესობის წარმომადგენლები მედიის ყურადღების მიპყრობას ცდილობენ. ამ და სხვა პრობლემებზე არასამთავრობო ორგანიზაცია "LGBT საქართველოს" აღმასრულებელი დირექტორი დავით მიხეილ შუბლაძე გვესაუბრება.
- ამ ეტაპზე ვახორციელებთ პროექტს, რომელიც სექს-მუშაკი მამაკაცების გადამისამართებას და კონსულტირებას მათთვის მისაღებ ორგანიზაციებში ითვალისწინებს. ჩვენს მოვალეობაში შედის ამ ადამიანებთან გასაუბრება, უსაფრთხო სექსის საშუალებების უსასყიდლოდ გადაცემა და შემდეგ მათი დარწმუნება, რომ მათივე უსაფრთხოებისთვის ანალიზები გაიკეთონ.
- როგორ უკავშირდებით ასეთი ტიპის ადამიანებს?
- ამ ადამიანებს თავიანთ სამუშაო ადგილას ვხვდებით, მაგალითად ცირკთან, სადაც ისინი სექს მუშაკებად მუშაობენ. კვირაში ორი-სამი დღე მონიტორინგს ეთმობა და მათ ვურიგებთ ბუკლეტებს, სადაც მათვის საჭირო ინფორმაციაა.
ჩვენი პროექტი მათ დახმარებას მხოლოდ სამედიცინო კუთხით ითვალისწინებს, მაგრამ ამ შეხვედრების დროს ისინი გვიყვებიან, თუ რა ხშირად ხდება მათი უფლებების დარღვევა სამართალდამცავების მხრიდანაც კი. თუკი ჩვენ დავითანხმეთ ეს ადამიანები, რომ საქმეს სამართლებრივი მსვლელობა მიეცეს, ამაშიც ვეხმარებით. საქართველოს ახალგაზრდა იურისტებთან ერთად ვცდილობთ, მივაღწიოთ სამართლიანობას და დაისაჯონ ის ადამიანები, რომლებიც დევნიან და ჩაგრავენ მათ.
- რამდენიმე დღის წინ ცირკის ტერიტორიაზე თავს დაესხნენ ერთ-ერთ ტრანსგენდერს, თუ ესაუბრეთ მას...
- ეს არის ზიზი. როცა მასზე თავდასხმის შესახებ ნიუსი წავიკითხე, გავოცდი, რადგან ნიუსში ეწერა ტექსტი, რომელიც მან შემთხვევამდე ორი კვირით ადრეც მითხრა. ამაზე ძალიან აღვშფოთდი და გამოვხატე კიდეც ჩემი დამოკიდებულება.
- ამ კონკრეტულ შემთხვევაში შეიძლება ტყუილს ჰქონდეს ადგილი?
- მათზე ძალადობის ფაქტები მართლა ხშირად ხდება და ამას არ უარვყოფ, მაგრამ კონკრეტულად ზიზის მონათხრობი ისტორია, რომ ის მუცელში დაჭრეს და ნაწლავი გადმოუვარდა, ეს ორი კვირით ადრე ჩემთან საუბარში თქვა. არ ვიცი, შეიძლება მკურნალობის გავლის შემდეგ ისევ პანელზე დადგა, ისევ იძალადეს მასზე და ალბათ, ისევ იგივე განმეორდა. ვფიქრობ, ამ ადამიანებს მედიის ყურადღების მიპყრობა სურთ, რათა ყველას გააგებინონ, რომ მათი უფლებები ირღვევა. მთავარი პრობლემა ის არის, რომ როცა ჩვენ ვთხოვთ მათ კონკრეტულ ძალადობაზე დაწერონ განცხადება, ისინი უკან იხევენ, რადგან მერე უკვე მათი კონფიდენციალურობის პრობლემა დგება. ჩვენ მათ ვურჩევთ, რომ როგორმე ჩაიწერონ, როცა მათზე ხორციელდება ჩაგვრა და ძალადობა, იმისთვის რომ ჩვენც გვქონდეს გამყარებული ჩვენი არგუმენტები შესაბამისი მტკიცებულებებით. ფაქტების დოკუმენტირება აუცილებელია, რომ ჩვენ მივმართოთ შესაბამის ორგანიზაციებს. ხუთი წელია ამ სფეროში ვმუშაობ და მხოლოდ ერთი შემთხვევა მახსენდება, როცა დაზარალებული ბოლომდე გამომყვა.
- შეგიძლია გაიხსენო, რა შემთხვევა იყო?
- ეს იყო ბიჭი, რომელიც ჯარში მსახურობდა. მას აშანტაჟებდნენ და აიძულებდნენ სხვა სამხედროებზე, რომლებიც მასთან ერთად მსახურობდნენ, მოეპოვებინა და მიეწოდებინა ინფორმაცია კონკრეტული ადამიანებისთვის. წინააღმდეგ შემთხვევაში კი საჯაროს გახდიდნენ იმ ჩანაწერს, რომელიც ძალით მოიპოვეს მისგან. როგორც თავად თქვა, დასვეს კამერასთან და უთხრეს, რომ შენზე ყველაფერი ვიცით და მოყევიო, შემდეგ კი ამ ჩანაწერით აშანტაჟებდნენ. მან დაწერა განცხადება და ჩვენ
- რამდენი ადამიანი ჰყავს თქვენს ორგანიზაციას აღრიცხული?
- თვის განმავლობაში 20-30 ადამიანამდე გვყავს. წინა თვეს მხოლოდ 5 იყო სექს-მუშაკი, დანარჩენები კი რიგითი ბენეფიციარები იყვნენ. ჩვენი ორგანიზაციის შესახებ უკვე იციან და თავადაც გვიკავშირდებიან იურიდიული, სამედიცინო, ან ფსიქოლოგიური დახმარებისთვის. ჩვენს პროექტს "არტიაის" ფონდი აფინანსებს.
წყარო/Source: http://www.ambebi.ge
