25 მილიონიანი ინვესტიცია სამეგრელოში-ჩინურ მხარესთან მემორანდუმი გაფორმდა
საქართველოს სოფლის მეურნეობის მინისტრი ოთარ დანელია და სამეგრელო–ზემო სვანეთში სახელმწიფო რწმუნებული – გუბერნატორი ბატონი ლევან შონია ოფიციალური ვიზიტით ჩინეთის სახალხო რესპუბლიკის სინძიანის პროვინციის ხელისუფლების მოწვევით ჩინეთის სახალხო რესპუბლიკაში იმყოფებოდნენ. საქართველოს დელეგაციას ასევე წარმოადგენდა სამეგრელო-ზემო სვანეთის რეგიონული პროექტების კოორდინირების სამსახურის უფროსი დათო კოდუა და სენაკის მუნიციპალიტეტის გამგებელი გოჩა დგებუაძე. ვიზიტის მიზანი იყო ინვესტიციების მოზიდვა და ურთიერთთანამშრომლობის მემორანდუმის გაფორმება სამეგრელო-ზემო სვანეთის რეგიონში სოფლის მეურნეობის კომპლექსურ განვითარებასთან დაკავშირებით. მემორანდუმი გაფორმდა ჩინეთის სამშენებლო სამრეწველო ჯგუფსა და სახელმწიფო რწმუნებულის-გუბერნატორის ადმინისტრაციას შორის. მემორანდუმის ხელმომწერი მხარეები ითანამშრომლებენ შემდეგ საკითხებში: 1) სოფლის მეურნეობის წარმოების ძირითადი დარგების განვითარება. 2) მესაქონლეობის განვითარება 3) მემცენარეობისა და მეცხოველეობის პროდუქციის წარმოება, გადამუშავება 4) მეჩაიეობის დარგის აღორძინება განვითარება 5) სატბორე მეურნეობების განვითარება. 6) ჰიდროენერგეტიკის განვითარება 7) მშენებლობის სფერო 8) ტურიზმის განვითარება 9) სამაცივრე მეურნეობების განვითარება. პირველ ეტაპზე გათვალისწინებულია სენაკის მუნიციპალიტეტში 650 ჰექტარი ჩაის პლანტაციის აღდგენა, რომელზეც გათვალისწინებულია 25 მილიონი დოლარის ინვესტირება. პროექტის განხორციელება დაიწყება ოქტომბრის თვეში. ჩინური მხარის მიერ გათვალისწინებულია ასევე მნიშვნელოვანი ინვესტიციების განხორციელება ეკონომიკის სხვადასხვა სექტორებში.
