შს მინისტრის, ალექსანდრე ჭიკაიძის განცხადებას, რომ კამპანია “ეს შენ გეხება” შსს-ს დისკრედიტირებას ახდენს და კამპანიის მესიჯი - “ისევ გვისმენენ” არის ტყუილი, საიას თავმჯდომარე კახა კოჟორიძე ეხმაურება, რომელიც მონაწილეობს აღნიშნულ კამპანიაში.
“ეს, ფაქტობრივად, მემკვიდრეობით მიღებული არგუმენტია. როდესაც წინა წლებში ჩვენ ხელისუფლებისთვის არმოსაწონ კამპანიას ვიწყებდით, ან რაღაც კონკრეტულ საკითხში გვიხდებოდა მხილება, მაშინ როდესაც არგუმენტების ნაკლებობა იყო ხელისუფლების წარმომადგენლების მხრიდან, ყოველთვის იყო მითითება, რომ აი, ესენი დისკრედიტირებას აკეთებენ. იგივე 26 მაისის თემას გავიხსენებდი, როდესაც საია კითხვებს სვამდა, რომ სახურავზე აღმოჩენილი ადამიანი შეიძლება მართლა დენით გარდაცვლილი არ იყოს, მაშინ მახსოვს ხელისუფლების წარმომადგენლების განცხადება, რომ შსს-ს დისკრედიტაციას აკეთებენ. აქაც იგივე სიტუაციაა. ჩვენ გვაინტერესებს კონკრეტული არგუმენტები, რატომ არ მოსწონთ ის კანონმდებლობა, რასაც ჩვენ ვთავაზობთ. არა ის, რომ ზოგადი განცხადებებით ვისაუბროთ დისკრედიტაციაზე,”- ამბობს კოჟორიძე "ნეტგაზეთთან" საუბარში.
კოჟორიძის თქმით, აღნიშნული სისტემური პრობლემის მოგვარების მიზნით ხელისუფლების ქმედითი ნაბიჯების შესახებ მას ინფორმაცია არ აქვს.
“ჩვენი ინფორმაციით, ამ მიმართულებით არაფერი გაკეთებულა. შესაძლებელია უკანონო მოსმენების პრაქტიკა შემცირდა, მაგრამ ეს ჩვენ არ ვიცით. ამას ვერც უარვყოფთ და ვერც დავადასტურებთ.”
როგორც საიას ხელმძღვანელი ამბობს, არსებულ კანონმდებლობაში ხარვეზების გამოსწორების მიზნით პარლამენტში შეტანილი პროექტის მიუხედავად, ცვლილებები ახალი ხელისუფლების პერიოდშიც არ ხდება.
“არსებული კანონი არ ითვალისწინებს კონკრეტულად არც მოსმენის ვადას, არც სიმკაცრეს, არც კონტროლის ეფექტურ მოსაზრებებს, ეს კანონი არ შეცვლილა. ასევე ფაქტია რომ, იმ სავარაუდო დამნაშავეებზე, რომლებზეც ვამბობთ, რომ 20 ათასზე მეტი უკანონო ჩანაწერი შექმნეს, ფაქტობრივად, არავინ [ყოველ შემთხვევაში ჩვენ არ გვაქვს ინფორმაცია], არცერთი კონკრეტული ადამიანი პასუხისგებაში არ მიცემულა. როდესაც ხელისუფლების წარმომადგენლები საუბრობენ სისტემურ დანაშაულებრივ ქმედებაზე იმ წლებში, მაგრამ არ გვაქვს ერთი კონკრეტული ქმედება ან ერთი კონტრეტული პირი პასუხისგებაში მიცემული ამ კუთხით, ცოტა უცნაურია ისაუბრო სისტემურ დანაშაულზე. უცნაურია, როდესაც 20 ათას უკანონო ჩანაწერს აღმოაჩენ და პასუხისგებაში მიცემულ პირთა რაოდენობა 0-ს უტოლდება, ”- ამბობს კოჟორიძე.
ახალგაზრდა იურისტთა ასოციაციის ხელმძღვანელის თქმით, ძალიან მარტივი გამოსაძიებელია, თუ ვინ ახორციელებდა აღნიშნულ ფარულ ჩანაწერებს.
“სწორედაც იმიტომ რომ პასუხისგებაში არ იქნენ ის ადამიანები მიცემული დღეს, იგივე უკანონო დავალებების შესრულება უწევთ. არ ვიცი, ეს უბრალოდ ვარაუდია, ცხადია, მე ამას დადასტურებულად ვერ ვიტყვი. როცა არც ერთი მათგანის პასუხისგებაში მიცემა არ ხდება, ცხადია, კითხვებს აქვს ლეგიტიმური არსებობის საფუძველი.”
აქვე კოჟორიძე იხსენებს არასამთავრობო ორგანიზაციების მიერ ჩატარებულ კვლევას, რომლის მიხედვით, საქართველოს მოქალაქეთა 60%-ზე მეტი ტელეფონზე არ საუბრობს პირადი ცხოვრებასა და პოლიტიკურად სენსიტიურ თემებზე.
მისი თქმით, საზოგადოებას კვლავ აქვს განცდა, რომ უსმენენ.
“როდესაც ასეთი განცდები და გამწყობებია მოსახლეობაში, სწორედაც ხელისუფლებას ევალება, რომ ახსნას, რომ ეს ასე არ არის. განცხადება, რომ ახლა იმდენად კეთილსინდისიერი ვარ, რომ ამას არ ვიკადრებ, რა თქმა უნდა, ბავშვური თამაში იქნება თუ ვინმე მხოლოდ ამ განცხადებას დაყრდნობა და იტყვის, რომ რადგან ასე თქვეს და ხელისუფლება შეიცვალა, 100%-ით დარწმუნებულნი ვართ, რომ ახალი ხელისუფლების წარმომადგენლები ამას არ იკადრებენ. შეიძლება მართლაც არ კადრულობენ, მაგრამ როცა სისტემა არ იცვლება, ასეთი განცხადებები ვერ იქნება სხვაგვარი განცდების საფუძველი.”
რაც შეეხება შს მინისტრის განცხადებას, რომ არასამთავრობო ორგანიზაციების მხრიდან აქტიურობა ფარულ მოსმენებთან და მიყურადებებთან დაკავშირებით მხოლოდ დღეს გაჩნდა, კოჟორიძე ამბობს:
“წინა წლებში ახალგაზრდა იურისტრთა ასოციაციას ამ საკითხზე არაერთხელ უსაუბრია და სხვა ორგანიზაციებსაც. საიას აქვს სამი ძალიან მნიშვნელოვანი კონსტიტუციური სარჩელი შეტანილი. ჩვენი წვლილია იმ კუთხით, რომ გარკვეული საშინელი მუხლები, თუნდაც ნაწილობრივ ამ კანონიდან ამოღებული იყო. ახლაც შეტანილი გვაქვს. ვინც დაინტერესებულია ამ საკითხებით, შეუძლია მარტივად გადაამოწმოს.
როდესაც დღეს ამ ფრაზას ვკითხულობდი, ორჯერ – სამჯერ წავიკითხე ეს კომენტარი, რომ მართლაც დავრწმუნებულიყავი ბატონი ალექსანდრე ჭიკაიძე ამბობდა თუ არა ამას, იმიტომ რომ ცოტა უცნაურია მისი მხრიდან არასამთავრობო ორგანოების, აი, ამ კუთხით დადანაშაულება, რომ აი, მაშინ ჩვენ ჩუმად ვიყავით. და თვითონ როგორ მოქმედებდა, ეს არის საინტერესო. კითხვა მინდა დავუსვა, თუ დაეხმარებოდა არასამთავრობო ორგანიზაციებს ამ პრობლემის მოგვარებაში ან რამე ინფორმაციას მიაწვდიდა, ან მიუთითებდა ამ პრობლემის სხვადასხვა დეტალზე, როგორ მოქმედებდა და როგორ ებრძოდა ამ სისტემას. იქნებ ამ კითხვაზეც მივიღოთ პასუხი. ძალიან საინტერესოა. სხვა არ უნდა დაადანაშაულო იმაში, რასაც შენ უკეთესად არ აკეთებდი. არა მგონია ალექსანდრე ჭიკაიძეს, რომელიმე ორგანიზაციაზე ერთი–ორი სიტყვით მეტი გაეკეთებინოს.”
კახა კოჟორიძე ამბობს, რომ სახელმწიფოს მიერ ამ მხრივ გადადგმული ქმედითი ნაბიჯების შემთხვევაში არასამთავრობო ორგანიზაციები აღნიშნულ კამპანიას არ დაიწყებდნენ.
“სამწუხაროდ, ძალიან ბევრ ადამიანს ჰგონია, რომ ადამიანის უფლებებისთვის ბრძოლა არის სახალხო დამცველის და არასამთავრობო ორგანიზაციების ვალდებულება. რა თქმა უნდა ეს ასე არ არის. პირველ რიგში ამის ვალდებულება აქვს სახელმწიფოს, სამართალდამცავ ორგანოებს. ისინი თავიანთი აქტიური მუშაობით, არასამთავრობო ორგანიზაციებს, ამ პრობლემების ძალიან ვიწრო არაეალს დაუტოვებდნენ. როცა კანონპროექტი შეტანილია და დევს თაროზე, გადის თვეები და ამაზე არავინ არაფერს არ აკეთებს. შინაგან საქმეთა სამინისტროს ჩარევით, მთავრობა დებს უარყოფით დასკვნას, რომ თურმე რა ცუდია ეს კანონპროექტი. სანამ ეს კამპანია არ დაიწყო, არავის დაუწყია პარლამენტში ამ საკითხზე აქტიურად საუბარი. რა თქმა უნდა ამ სიტუაციაში არასამთავრობო ორგანიზაციები აბსოლუტურად სწორად იქცევიან. თუ რამე ძვრა არის სწორედ ამ კამპანიის დამსახურებაა.”
_5769.jpg)
