"ნაციონალური მოძრაობის" ერთ-ერთი ლიდერის, დეპუტატ ნუგზარ წიკლაურის ცემის ინციდენტში მონაწილე პირები სამართალდამცავებს დღემდე არ დაუკავებიათ.
ერთ-ერთი ინფორმაციით, საპარლამენტო უმცირესობის წევრი, ნუგზარ წიკლაური ლადო ვარძელაშვილის მეგობრებმა, წიკლაურსა და ვარძელაშვილს შორის არსებული პირადი უთანხმოების ნიადაგზე სცემეს.
Prime Time News-მა აღნიშნული ინფორმაცია ლადო ვარძელაშვილთან გადაამოწმა. როგორც ვარძელაშვილი აცხადებს, მას წიკლაურთან ნორმალური ურთიერთობა აქვს და აღნიშნული ინფორმაცია აბსურდია.
"ნუგზარ წიკლაურთან ჩვეულებრივი, მეგობრული, კარგი ურთიერთობა მაქვს. ვინ მობოდა, ვინ ამბობს მაგას, სად გაიგეთ, რაღაც ლოგიკაში ხომ უნდა ჯდებოდეს. სისულელე და ბოდვაა ეგ ყველაფერი", - განაცხადა ლადო ვარძელაშვილმა.
