საქართველოში სლოვაკეთის დროშა დაწვეს, რომელიც რუსეთის დროშაში აერიათ. ასე ეხმაურება "ბი-ბი-სი"-ს რუსული სამსახური თბილისში , 9 აპრილის მემორიალთან წუხელ გვიან ღამით მომხდარ შემთხვევას.
"თბილისში, 1989 წლის 9 აპრილს საბჭოთა ჯარების მიერ დარბევის შედეგად დაღუპულთა მემორიალთან, უცნობებმა სლოვაკეთის დელეგაციის მიერ მიტანილი გვირგვინიდან ლენტი ჩამოხსნეს და დაწვეს", - აღნიშნავს რუსული "ბიბისი".
ამასთან, "ბიბისი" ქართულ მედიაზე დაყრდნობით წერს, რომ გვირგვინზე გადაკრული ლენტი რუსულ სიმბოლიკაში აერიათ და პროტესტის ნიშნად დაწვეს.
"ბიბისი"-ს რუსული სამსახური ასევე აღნიშნავს, რომ მომხდართან დაკავშირებით საქართველოს საგარეო საქმეთა სამინისტრომ მწუხარება გამოთქვა და აღნიშნა, რომ იმედოვნებს, ეს ქმედებები უნებლიედ იქნა ჩადენილი.
თბილისში, წუხელ 9 აპრილის მემორიალთან სლოვაკეთის დელეგაციის მიერ მიტანილი გვირგვინის ლენტი სამგორის რაიონის გამგებლის მოადგილე, ბესო გაზდელიანმა დაწვა, რადგან მიიჩნია, რომ ლენტი რუსეთის დროშის ნაწილი იყო
სამგორის რაიონის გამგებლის მოადგილე ბესო გაზდელიანი წუხელ, 9 აპრილის მემორიალთან, სლოვაკეთის დელეგაციის გვირგვინის ლენტის დაწვისთვის ბოდიშის მოხდას არ აპირებს. როგორც "ინტერპრესნიუსს" გაზდელიანმა განუცხადა, უმჯობესი იქნებოდა, სლოვაკეთის დელეგაციას გვირგვინზე არა რუსეთის დროშის ინდენტური ფერების ლენტი, არამედ მინაწერი გაეკეთებინა.
